रस्ता ररूंदीकरण कारवाईतंर्गत 114 व्यावसायिक बांधकामे निष्काषित

23 गॅरजेसवर बुलडोझर - महापालिका आयुक्तांच्या उपस्थितीत कारवाई

उद्या वागळे इस्टेटमधील 16, 22, 33 या रस्त्यांवर होणार कारवाई

ठाणे (4): मंजुर विकास आराखड्यातील रस्ते मोकळे करून ते रूंद करण्याची कारवाई आजपासून धडाक्यात सुरू झाली असून महापालिका आयुक्त संजीव जयस्वाल यांच्या उपस्थितीत आज वाघबीळ नाका ते वाघबीळ गाव रस्त्यावरील जवळपास 114 बाधित व्यावसायिक बांधकामे जमीनदोस्त करण्यात आली. तथापि या रस्त्यात बाधित होणा-या 13 निवासी बांधकामांमध्ये राहणा-या कुटुंबांचे पुनर्वसन करून ती बांधकामे निष्काषित करण्याचे आदेश श्री. जयस्वाल यांनी दिले. या कारवाईमुळे हा रस्ता आता 40 मीटरचा होणार आहे.

            दरम्यान रस्ता रूंदीकरण मोहिमेबरोबरच आज घोडबंदर रोज सेवा रस्त्यावरील जवळपास 23 गॅरेजेस तोडून टाकण्यात आली. सदरची कारवाई उद्याही सुरू ठेवण्याचे आदेश महापालिका आयुक्तांनी दिले असून कारवाईच्या दुस-या दिवशी वागळे इस्टेट रोड नं. 16, 22 आणि 33 या रस्त्यांच्या रूंदीकरणाची कारवाई हाती घेण्यात येणार आहे.

            आज सकाळपासून कडक पोलिस बंदोबस्तात वाघबीळ जंक्शन ते वाघबीळ गाव या दरम्यान रस्ता रूंदीकरण कारवाईला सुरूवात करण्यात आली. या कारवाई अंतर्गत जवळपास वाघबीळ नाका ते वाघबीळ गाव या रस्त्यावरील जवळपास 114 व्यावसायिक बांधकामे निष्काषित करण्यात आली.

            दरम्यान आज घोडबंदर रोडवरील गॅरेजेसवरही जोरदार कारवाई करण्यात आली असून या कारवाईमध्ये जवळपास 23 गॅरेजेस तोडून टाकण्यात आले.

            सदरची कारवाई उपायुक्त (अतिक्रमण) अशोक बुरपल्ले, संदीप माळवी, नगर अभियंता राजन खांडपेकर, उपनगर अभियंता रविंद्र खडताळे, अर्जून अहिरे, सहाय्यक आयुक्त चारूशीला पंडीत, मारूती गायकवाड, शंकर पाटोळे, अनुराधा बाबर, झुंजार परदेशी कार्यकारी अभियंता नितीन पवार, नितीन येसुगडे, दिपक घाडगे, रामदास शिंदे, चेतन पटेल यांनी पोलिस बंदोबस्तात केली.